【西九法院外戒備森嚴 潘太痛批「排隊黨」荒繆：舊香港人排隊變非法，新香港人收錢聽審？】
- 8月28日
- 讀畢需時 1 分鐘
支聯會案今日於西九龍裁判法院聆訊，法庭外安檢程序與排隊秩序引來市民質疑。自稱「舊香港人」且幾乎日日到法庭旁聽的市民潘太受訪時表示，昨日警方在無記者情況下對兩名老人家態度惡劣，今日因大批媒體現場監督，警察態度才轉為有禮，直言：「吖咁多記者影住你，你梗係有禮貌啦！當冇記者、冇人知嘅時候，你哋咪對我哋咁惡囉咁凶囉，係咪？」
對於法庭外出現大量留宿數天排隊的「排隊黨」，潘太質疑背後有人資助，甚至聽聞有人透露排隊可獲數千元報酬：「你識得支聯會啲乜嘢？使唔使排四日街、風吹雨打排四日街嚟度瞓？唔收錢，你會走嚟？」她批評當局任由排隊黨佔用公眾地方，反觀關心案件的香港人卻被排擠：「搞到我哋而家啲舊香港人嚟排隊，好似係非法咁。」
談及鄒幸彤、李卓人及何俊仁等被告，潘太直言案件關押多年極不公平：「老實講幸彤、李卓人、何俊仁佢犯咗乜嘢法？都未審，都未判，你已經困咗人哋幾年啦，你覺得呢個係公平嘅法律？」曾因社運入獄三個月的潘太強調自己心安理得、毫無畏懼：「我唔驚，我接受你哋訪問，我就冇驚過，驚我就龜縮一邊唔接受你哋嘅訪問！」
留言